FBK me mesazh ndaj klubeve

Përmes një njoftimi në faqen zyrtare, Federata e Basketbollit të Kosovës ka dhënë një mesazh për klubet e basketbollit në Kosovë. Mesazhi i plotë nga FBK-ja është paraqitur më poshtë:

“Për shkak të paqartësive në organizim të brendshëm të klubeve, mosmbajtjes së Kuvendeve të Punës dhe Kuvendeve Zgjedhore sipas afateve të rregullta, paqartësive rreth kompetencave dhe mandateve rreth drejtuesve të klubeve dhe me qellim te krijimit te strukturave funksionale menaxhuese, përcaktimit të personave përgjegjës për menaxhimin e përgjithshëm dhe financiar, ridefinimit të marrëdhënieve juridike ndërmjet klubeve dhe FBK-së, Bordi FBK-së fuqishëm sugjeron të gjitha klubet e Superligës që të riregjistrohen, të mbajnë Kuvendet zgjedhore ose të ndërmarrin veprimet e nevojshme për të informuar saktë FBK-në për emërimet dhe kompetencat e personave përgjegjës në këto pozita:

Bordi/organet drejtuese

Statuti i klubit, ku duhet të përfshihen kompetencat e organeve drejtuese dhe mënyra e raportimit financiar

Personat e autorizuar për përfaqësim të klubit të FBK/FIBA

Personin e autorizuar për çështjet financiare të klubit

Personin e autorizuar për çështje të sigurisë dhe organizimit të ndeshjeve

Personat e autorizuar për menaxhim te shkollës/akademisë në basketbollit në klube
FBK do të përkujdeset që klubeve që riregjistrohen t’u njihet vazhdimësia e rezultateve sportive dhe t’u barten obligimet e klubeve ndaj FBK-së dhe anasjelltas.

Klubet e Superligës do t’i nënshtrohen Rregullores për Licencim të Klubeve dhe Shkollave të Basketbollit si klube profesionale, kurse për dispozitat e kësaj rregulloreje do të njoftohen deri në fund të muajit korrik 2016.”