Ferizaji fiton në Drenas, Nikli 74 pa fitore pas 10 xhirove!

Në ndeshjen hapëse të xhiros së dhjetë në Superligë, Feronikeli 74 ka pësuar humbje minimale nga Ferizaji.

Takimi në fjalë u mbyll 0-1 (Abdeen Abdul (P) 78’) për mysafirët.

Ky rezultat bën që Nikli të shkojë në 10 ndeshje pa fitore në Superligë, në po aq xhiro të luajtura. Për më tepër, skuadra nga Drenasi deri më tash ka shënuar vetëm 3 gola gjithsej!

Pjesa e parë ishte tejet e dobët dhe nuk prodhoi asnjë rast serioz për shënim.

TABELA AKTUALE

Pak më e gjallë ishte pjesa e dytë, ku të parët që rrezikuan ishin vendasit.

Në rastin e parë më të rrezikshëm, goditjen e grekut Ioannidis e priti Jovanovski, portieri mysafir (61’). Më pas pasuan goditjet e Hasan Hysenit e Alban Shillovës, por të dyja të pasuksesshme.

Ndërkohë, goli erdhi në cepin tjetër të fushës. Nga pika e bardhë për 0-1 të Ferizajit shënoi Abdeen Abdul (78’), gol me të cilin edhe u mbyll ndeshja.

Kjo fitore është tejet e rëndësishme për Ferizajin në luftën për mbetje në elitë, kurse Nikli mbetet skuadra më e rrezikuar për rikthim në Ligën e Parë.

Në ndeshjen e ardhshme, Nikli 74 ka punë me Llapin në Podujevë, e Ferizaji e pret Malishevën.