Gençoglu: Trepça do të bëhet kampione!

Në deklaratën e dhënë pas ndeshjes së fituar ndaj Vëllaznimit, trajneri turk i Trepçës, Engin Gençoglu ka dhënë një premtim të madh për qytetin e Mitrovicës.

Ai kishte thënë kur erdhi në Mitrovicë se “Trepça është rikthyer” ndërsa sot në deklaratën e tij pas ndeshjes ka kërkuar që të ndërrohet mesazhi.

“E dini që kam thënë se ‘Trepça është rikthyer’ dhe ajo u rikthye. Ndërsa tash po ju them ‘Trepça do të bëhet kampione’,” ka thënë Gençoglu ndër të tjera pas ndeshjes.

“Mos e harroni këtë, Trepça do të bëhet kampione, pa marrë parasysh kundërshtari kush është, Prishtina, Bashkimi, Ponte Prizreni, apo edhe Real Madridi…”

Ai ka theksuar se nuk ka rëndësi për te kundërshtari, pasi që e di se ka ekipin më të mirë dhe tifozët më të mirë në dispozicion. Prej se ardhur Gençoglu te Trepça në janar, ekipi ka pasur bilans 8-2, duke u mposhtur vetëm nga Prishtina e Peja, ndërsa të gjitha ndeshjet tjera i ka fituar, në mesin e të cilave edhe Kupën e Kosovës, ku në finale triumfoi ndaj prishtinasve 74-66.

Trepça në çerekfinale të PlayOffit do të ndeshet me Bashkimin.