KB Bora nis kompletimin e ekipit për stinorin e radhës

Skuadra e Ligës së Parë të Kosovës në basketboll, KB Bora, ka filluar qe një javë të nënshkruajë me lojtarët e saj dhe të afrojë lojtarë në ekip, ashtu që të nis përgatitjet sa më herët për tu bërë gati për stinorin e ri, 2023/24.

Ekipi nga Liga e Parë e Kosovës që vjen nga Prishtina, në stinorin e kaluar arriti deri në finale të playoffit të Ligës së Parë, ku u eliminua nga Istogu. Ndërsa në ndeshjen e barazhit, nuk pati fuqi t’i vihet ballë KB Prizrenit të drejtuar nga Edin Kërveshi.

Kështu, Bora ka vazhduar së pari me kapitenin e saj, Dion Haxhosaj, që ka nënshkruar edhe për tri vitet e ardhshme me ekipin. Njëjtë, edhe Mërgim Jakupi ka bërë kontratë trevjeçare me skuadrën.

Jon Ismajli gjithashtu ka vazhduar marrëveshjen me KB Borën, ndërsa së fundi ekipi ka bërë të ditur se ka siguruar edhe shërbimet e reprezentuesit U-20 të Kosovës, mitrovicasit Anes Gashi.

KB Bora në stinorin e kaluar është drejtuar kryesisht nga Arben Krasniqi, ish-trajner i Kosovës dhe Prishtinës.◼️