Kosova ngritet për 3, Shqipëria për 2 pozita pas ndeshjeve të tetorit

Sot është publikuar lista e re e renditjes së reprezentacioneve të futbollit nga FIFA. Renditja mujore e FIFAs, ka parë që pas ndeshjeve të muajit tetor Kosova të ngritet për tre pozita në listë, ndërsa Shqipëria dy.

Kosova kështu ka arritur pozitën më të mirë të saj në histori, të cilën e ka pasur edhe më parë, pozitën e 101-të. Ndërsa Shqipëria ka kërcyer për dy vende lart, duke dalë në pozitën e 65-të.

Ngritjet kanë ardhur si pasojë e rezultateve të arritura në ndeshjet e Ligës së Kombeve, ku Kosova ka shënuar dy fitore, ndaj Lituanisë si mysafire dhe ndaj Qipors si vendase. Njëjtë, edhe Shqipëria ka arritur të shënojë fitore të rëndësishme si mysafire ndaj Gjeorgjisë, pas disfatës nga Çekia. Bile, me këtë fitore Shqipëria ka dalë mbi Gjeorgjinë në renditje.