Kush është trajneri i ri i Pejës!?

Një djalosh i ri malazias me 34 vjetët e tij do të merr përgjegjësinë më të madhe në karrierën e tij duke e udhëhequr kampionin aktual të Kosovës në basketboll, Peja. 

Slobodan Boban Savovic prej mbrëmë është zyrtarizuar si trajner i ri i verdhezinjëve nga qyteti Perëndimor i Kosovës dhe do t’i udhëheq ata deri në fund të stionrit në rrugë për mbrojtje të tillullit. 

Basketbollisti premtues, që u bë trajner perspektiv

E tëra kjo, me dëshirë dhe rekomandim të tanimë ish trajnerit, Daniel Lutz, njohësit të madh të basktetbollit që arriti të këndellë Pejën përkundër fondit jo të mjaftueshëm të lojtarëve për Balkan League. 

Savovic ka studiuar në SHBA dhe ka luajtur për Partizanin e Beogradit basketboll si lojtar mjaft i talentuar, derisa disa lëndime e ndaluan atë për një karrierë më të bujshme basketbollistike. Ai aftësitë e tij basketbollistike i ka treguar edhe në SHBA si lojtar. 

Ndihmës në Zalgiris, e trajner te Teodo

Malaziasi Savovic ka qenë ndihmës trajner i Zalgirisit të njohur lituanez, derisa stinorin e kaluar ka udhëhequr me sukses Teodon e Tivatit, deri në fillim të këtij stinori. 

Sipas raporteve nga Mali i Zi, Savovic shihet si një trajner mjaft perspektiv atje, ndërsa duke ditur cilësitë e tij, parashikohet një e ardhme e ndritur për atë. 

“Nuk do të ketë kurrëfarë problemi për Pejën nëse trajneri do të arrijë të ndikojë te lojtarët më në moshë në ekip. Peja do të vazhdojë me sukseset e saja”, ka thënë një burim malazias i afërt me Teodon për Borozani.com duke e vlerësuar mjaft Savovicin dhe duke vërtetuar njohuritë e tij si trajner.

Peja është kampione aktuale e Kosovës në basketboll. Ata ia nisën stinorin me trajnerin me potencial më të madh në Kroaci, Daniel Lutz, që u dëshmua me Cibonën stinorin e kaluar. 

Lutz ia lë Pejën Savovicit me bilanc pozitiv

Për shkak të problemeve familjare, deklaratë kjo zyrtare e klubit pejan, ai u largua mbrëmë nga posti i tij duke ia propozuar ekipit Savovicin. 

Peja në dy muajt e fundit nën drejtimin e Daniel Lutzit ka marrë formën e saj më të mirë dhe lojtarët kanë filluar të luajnë shumë më mirë pas komponimit të mirëfilltë në ekip. 

Epoka e Lutzit që pritej të ishte më e gjatë me Pejën, përfundoi si lider i stinorit vjeshtor në Superligë si dhe me bilanc pozitiv në Balkan League, 6 fitore e 5 humbje.

Tash pjesa e dytë e stinorit dhe puna më e vështirë e pret Savovicin e ri.