Lekndreaj: Tash e tutje, vetëm përpara

Basketbollisti luftarak i Prishtinës, Daniel Lekndreaj, ka qenë në disponim të mirë pas fitores jetike të shënuar të ekipit të tij mbrëmë ndaj Vëllaznimit.

Por, ai ka thënë se nuk është mirë për Prishtinën që të gëzohet për shpëtim nga rënia. Ndërsa ka premtuar, tash të shkohet vetëm përpara.

Prishtina mposhti Vëllaznimin me 3 pikë dallim dhe tashmë ka një pikë më shumë se Vëllaznimi, një xhiro pa përfunduar stinori i rregullt.

“Nuk më vjen mirë hiç që jemi në këtë pozitë. T’u u gëzu për mos me ra prej lige. Nuk i takon kjo Prishtinës. Por gjithsesi, fitorja është me e shiju dhe shpresojmë se po shkojmë veç përpara,” ka thënë Lekndreaj për mikrofonin e kanalit transmetues të ndeshjes.

Ndërsa sa i përket rëndësisë së ndeshjes ndaj Vëllaznimit dhe pozitës që për bardhekaltërit ishte gjithçka ky duel, ai tentoi të tregohet plotësisht i sinqertë.

“Shife. Krejt sinqerisht po ju tregoj. Na kemi pasur mbi shpatulla tanë Prishtinën, Plisat, Kryesinë dhe ka qenë ndeshje me shumë emocione. Ka kenë një ndeshje jetë a vdekje dhe kurrsesi nuk guxonim me e hup këto sot. Kena luftu që çdo top që është në diskutim me e marr Prishtina. Edhe Vëllaznimi duhet vlerësu që dha sot çdo gjë në fushë,” ka thënë shkodrani 23-vjeçar.

Sidoqoftë, për Prishtinën ende nuk ka përfunduar asgjë, pasi që ekipi tash në xhiron e fundit ndaj Bashkimit luan ndeshjen që ka një rëndësi të trefishtë: PlayOff, PlayOut ose rënie nga liga!

“Ne çdo ndeshje që e bëjmë, e japim maksimumin. Në secilën ndeshje dalim për fitore. Kjo është e gjitha. Për ndeshje me Bashkimin kena me u përgatit dyfish sa me Vëllaznimin për me e fitu,” ka përfunduar deklaratën e tij pas ndeshjes basketbollisiti i kombëtares shqiptare Lekndreaj, që këtë ndeshje ndaj Vëllaznimit e përfundoi me 5 pikë të shënuara, 8 kërcime e 4 asistime si dhe 2 topa të rrëmbyer.