Lutz nënshkruan me Pejën!

Trajneri i cili bëri kampion këtë stinor Cibonën e Zagrebit, Danijel Lutz, ka nënshkruar kontratë njëvjeçare me kampionen e Kosovës, Pejën. 

Ashtu siç paralajmëroi Borozani.com ditë më parë që Peja është në bisedime dhe është shumë afër marrëveshjes me trajnerin e kampionit kroat - ai tashmë bëhet e ditur, nga korrespondenti ynë në Kroaci, se ka nënshkruar me skuadrën verdhë-e-zi nga Peja. 

KUSH ËSHTË DANIJEL LUTZ? 

Lutz, ka kaluar tërë karrierën e tij si trajner në Cibonë, ku gati tërë kohën ka qenë ndihmës i trajnerëve të njohur si Velimir Perasovic, e pastaj edhe Jasmin Repesa. 

Ai për herë të parë shfrytëzoi rastin të bëhet numri një i bankës së Cibonës vitin e kaluar kur Josip Vrankovic u largua nga klubi zagrebas. Por, kjo ishte jetëshkurtër pasi që kaloi vetëm dy-tre xhiro në bankë, derisa këtë stinor me largimin e trajnerit Veljko Mrsic, ai përsëri ishte zgjidhje e përkohshme e Cibonës. 

Mirëpo, derisa Cibona shikonte trajner të ri, në këtë kohë, Lutz, tregon aftësitë e tij të trajnerit dhe me rezultate të mira fiton besimin e drejtuesve të klubit. 

Ekipi që ishte në rënie dhe që luante pa koncept, nën urdhërat e Lutzit, fitoi Kupën kroate ndaj Cedevitës, që ishte favorie absolute. (Cedevita, është skuadra më basketbollistë më të shtrenjtë aktualisht në tërë Ballkanin). 

Nuk vonoi shumë, Lutz arriti që të bëj Cibonën edhe kampione të Kroacisë, derisa askush nuk besonte në këtë ekip dhe atë me fitore bindëse 3-0 në finale të Play-Offit ndaj Zarës. 

Danijel Lutz, 34 vjeçar, njihet si ‘i sëmurë’ pas basketbollit, pasi që ditë e natë kalon duke shikuar inçizimet e ndeshjeve të ndryshme basketbollistike. Anglishten e flet rrjedhshëm. 

Ai karrierën e filloi si i ri në KK Dubrava (1996-2004), pastaj për një kohë të shkurtër ishte trajner i kategorive të reja në KK Zagreb (2005), ndërsa në Cibonë erdhi në vitin 2007, pasi që dy vite i kaloi si trajner i Kaptola.

Peja stinorin e kaluar që u shpallë kampion, udhëhiqej nga trajneri kroat Rudolf Jugo, me të cilin nuk vazhduan këtë stinor.