Peja liron Mazrekun

Njëri prej basketbollistëve më të mirë në pozitën e qendrës në Kosovë, Blerim Mazreku, nuk do të jetë më pjesë e skuadrës kampione të Kosovës, Pejës.

Sipas një komunikate të lëshuar nga klubi i Pejës, Mazreku tani është lojtar i lirë pasi që nuk e ka përkrahur strategjinë e klubit për fond të zgjeruar të lojtarëve në pozitën qendër.

Klubi pejan, gjithashtu e falenderoi basketbollistin në fjalë për bashkëpunimin në dy stinorët e fundit, duke i dëshiruar fat dhe suksese në karrierë.

Mazreku në stinorin e fundit është paraqitur në shumë pak ndeshje, për shkak të problemeve të shumta me lëndimin e gjurit.