PA GOLA!
Malisheva s’arrin kreun, barazon me Dritën
27 October, 2024 @16:21
Ekipi i Bekim Isufit, Malisheva nuk ka arritur të shfrytëzojë një mundësi të mirë për të dalë në krye të renditjes tabelare në fund të xhiros së dhjetë, pasi që në shtëpi barazoi me Dritën e Gjilanit. Ekipi vendas e kërkoi më shumë golin, por rastet asnjëherë ideale për të shënuar, në anën tjetër Drita e fokusuar mirë në lojë, bënë që dueli të përfundojë me rezultatin e fillimit të takimit: Malisheva - Drita 0-0!
Për të theksuar, prej minutës së 82-të të ndeshjes Drita luajti me 10 lojtarë, pasi që mbrojtësi Blerton Sheji u ndëshkua me karton të dytë të verdhë, duke dalë nga fusha e lojës.
Në fund, Malisheva është dashur të pajtohet me barazimin e sotëm, ndërsa pas dhjetë xhirosh është e dyta në renditje me 18 pikë të njëjta si lideri, Ballkani! Drita me dy ndeshje më pak në këto dhjetë xhiro, ka 15 pikë dhe është e pesta.
Derisa Malisheva në xhiron e radhës udhëton në Ferizaj, Drita pret Prishtinën.
