Mërlaku vendimtar, Dukagjini rikthehet te fitoret

Pas tri humbjeve radhazi në ligë, Dukagjini fitoreve i është rikthyer sot në takimin ndaj Ferizajit në Klinë.

Ferizajin skuadra e drejtuar nga Ismet Munishi e mposhti me rezultat minimal 1-0 (Altin Mërlaku 83’).

TABELA AKTUALE

Skuadra klinase ishte më kërkuese që nga fillimi dhe rrezikoi dukshëm më tepër.

Dy herë gjatë pjesës së parë porta e Ferizajit u shpëtua nga portieri Marko Jovanovski, e gjatë pjesës së dytë mbrojtja ferizajase u dorëzua.

Ishte Altin Mërlaku, ikona e skuadrës klinase për vite me radhë, ai që e gjeti rrjetën në minutën e 83’ dhe ia dhuroi skuadrës së tij fitoren minimale.

Kjo fitore e largon Dukagjinin nga zona e rrezikshme të paktën përkohësisht, kurse Ferizaj vazhdon ta rrezikojë seriozisht rikthimin në Ligën e Parë.