Paraqitje fantastike

Basketbollistët e rinj të Kosovës kanë arritur të ngrisin trofeun e fituesit dhe të dalin si fitues nga turneu masiv i basketbollit në Vienë, Basketball Wien 2013. 

“Ishim me fat që na u dha mundëisa të jemi pjesë e një turneu madhor si ky, ku morrën pjesë mbi 200 ekipe dhe mbi 3000 lojtarë nga mosha 12 deri 22 vjeçare,” ka shprehur së pari entuziazmin e tij Sylejmani, pas fitores së madhe të Kosovës në turneun masiv të basketbollit. 

Ai ka konsideruar paraqitjen e kosovarëve si te meshkujt ashtu edhe te femrat - thjeshtë fantastike. 

“Me të dy skuadrat si atë të meshkujve ashtu edhe atë të femrave kemi pasur paraqitje fantastike. Duke u bazuar se kjo është paraqitja e parë ndërkombëtare për vashat tona, është sukses i madh edhe për ato. Sa i përket meshkujve, e dini se edhe vitin e kaluar fituam turneun në Holandë, pra ky është triumfi i dytë ku Kosova fiton dhe kjo vërteton se ia ka vlejtur që të harxhojmë mund dhe mjete financiare me këto ekipe,” ka thënë ai. 

Derisa ka falenderuar përkrahësit si Departamentin e Sportit të Ministrisë për Kulturë, Rini dhe Sport, pastaj Bankën Kombëtare Tregëtare, Legean dhe Federatën e Basketbollit për përkrahjen e parezervë, ai nuk ka harruar që të shpreh adhurimin për djelmoshat dhe vajzat që ia zbardhën fytyrën shtetit tonë. 

“Janë aktivizuar të gjithë basketbollistë dhe mendoj se kanë arsyetuar të gjithë vendin që i është ndarë në përfaqësuese. Secilin, veç e veç, e falenderoj personalisht për angazhim, korrektësi dhe disciplinën e treguar. Gjithashtu, më kanë impresionuar edhe vajzat që përkundër mungesës së përvojës në arenën ndërkombëtare, kanë treguar se duhet t’u kushtohet rëndësi shumë e madhe punës me ato,” ka përfunduar Sylejmani bisedën e tij nga Viena me portalin tonë. 

Kosova U-18 meshkujt kanë fituar turneun Basketball Wien 2013 duke mposhtur në finale skuadrën gjermane, Schwabing, derisa vashat janë mposhtur në 1/8 e finales së këtij turneu.