Pas 4 vitesh, Peja mposht Prishtinën në Superligë

Rikthimi i Pejës në Superligë po bëhet tepër i madh. Posaçërisht pas përforcimeve në afatin kalimtar të janarit dhe veçmas sonte, kur para Karagaçit të stërmbushur, verdhezinjtë kanë mposhtur Prishtinën për herë të parë pas vitit 2016!

Skuadra pejane e mposhti Prishtinën me rezultat 82-76.

Gjashtë treshet e Dardan Berishës dhe katër asistimet i kanë dhënë epërsinë e madhe pejanëve në pjesë të parë. Ndërsa double-double i Drilon Hajrizit me 15 pikë e 12 kërcimeve kanë mbajtur stabilitetin në mbrojtje, e në minutat kur thyhej loja, Henrik Sirko ka shënuar pikë për të festuar e tërë palestra. Sirko përfundoi ndeshjen me 13 pikë e 6 kërcime.

Te Prishtina e sllovenit Hojc, pjesa e dytë ka qenë e shkëlyqer pas humbjes në parket në pjesë të parë. Amerikani Jordan Johnson ka shënuar 26 pikë thuajse nga secila pozitë, derisa Anthony Goods ka dhënë 22 pikë tjera - por pamjaftueshëm për të shmangur humbjen.

TABELA AKTUALE

Prishtina krahas humbje nuk lëvizi nga pozita e parë me 14 fitore e 5 humbje, derisa Peja aktualisht gjendet në pozitën e pestë më një ndeshje më shumë e me bilanc prej 10 fitoreve e 8 humbjeve.

Në xhiron tjetër Prishtina pushon, derisa Peja do të përballet me Feronikelin.