Pejën s’e ndal as Trepça

Peja ka shënuar edhe fitoren e tretë me radhë në stinorin pranveror. Skuadra lidere në BKT Superligë ka mposhtur Trepçën me rezultat të ngushtë 72-75.

Në palestrën Jeton Tërstena të Vushtrrisë, mitrovicasit e filluan lojën mirë me dy tre pikëshat e Drilon Hajrizit. Më pas Peja u këndell dhe doli në epërsi 7-8, duke e ngritur epërsinë në tre pikë deri në fund të periudhës së parë 21-24.

Në çerekun e dytë u dallua dueli ndërmjet Drilon Hajrizit dhe Dardan Berishës. Hajrizi këtë çerek e përmbylli me 10 pikë, derisa Berisha me dy më shumë. Trepça megjithëse në këtë pjesë arriti epërsinë më të lartë në ndeshje 33-26, më pas seria e mirë e pejanëve bëri që edhe njëherë të kthehet rezultati dhe të përfundojë pjesa e parë e ndeshjes me rezultat 39-41.

Gjatë kësaj periudhe pësoi lëndim edhe maqedonasi i Trepçës, Daniel Milanovski, ku më pas u konstatua e lëndimi i tij nuk ishte edhe aq serioz.

Çereku i tretë kaloi me një dominim të lehtë të Trepçës, ku me lojë të mirë u dallua plejmekeri Ryan White, ndërsa xehetarët dhjetë minutëshin e fundit e pritën me një pikë epërsi 61-60.

Në periudhën e katërt të ndeshjes pejanët ishin më të koncentruar në lojë dhe në fund rezultati përfundimtar doli të jetë 72-75 për Pejën.

Koshashënuesi më i mirë i ndeshjes ishte Drilon Hajrizi me 28 pikë, i ndjekur nga dy basketbollistët e Pejës, Dardan Berisha dhe Samir Shaptahovic, ku të dy kanë shënuar nga 26 pikë.

Në xhiron e ardhshme Peja e pret Sigkos Bashkimin, derisa Trepça do të jetë mysafire e Sigal Prishtinës.

Koshashënuesit e Trepçës

1	Drilon Hajrizi	28 pikë
2	Ryan White	17 pikë
3	Gazmend Asllani	10 pikë
4	Dennis Mims	6 pikë
5	Korab Prekazi	5 pikë
6	Valdrin Haxhiu	4 pikë
7	Fikret Hanxhic	2 pikë

Koshashënuesit e Pejës

1	Dardan Berisha	26 pikë
2	Samir Shaptahovic	26 pikë
3	Gerti Shima	10 pikë
4	Alban Veseli	5 pikë
5	Cyril Awere	3 pikë
6	Rron Grapci	2 pikë
7	Harouna Mutombo	2 pikë
8	Valdet Grapci	1 pikë