Përfaqësuesja A, mëson grupin para debutimit

Reprezentacioni senior i Kosovës në basketboll ka mësuar kundërshtarët e parë grupor në rrugë për Eurobasket 2017. 

Kosova ka rënë në Grupin E me këto vende: Sllovenia, Bullgaria dhe Ukraina. 

Kualifikimet për në Eurobasket 2017 do të nisin kah fundi i muajit të gusht dhe do të përfundojnë në mes të muajit shtator, ndërsa datat e sakta kur nisin ato janë 31 gusht dhe zgjasin deri më 17 shtator 2016. Do të zhvillohen nga dy ndeshje me rivalët në fjalë si vendas dhe mysafir. 

Në Kampionatin Europian të basketbollit, Eurobasket 2017, që do të zhvillohet në katër shtete, kualifikohen vendet e para nga grupet (gjashtë grupe) dhe katër vendet e dyta më të mira. 

Organizatorë të Eurobasket 2017 janë Finlanda, Izraeli, Rumania dhe Turqia. 

Kjo është hera e parë që Kosova do të merr pjesë me përfaqësuesen seniore në garat kualifikuese për Eurobasket. 

Kosova u pranua në FIBA, vitin e kaluar.