Play Offi nis nga Karagaçi

Emocionet e Play Offit në Superligën e basketbollit kosovar fillojnë sonte në palestrën Karagaçi në Pejë.

Dy rivalët e vjetër nga Rrafshi i Dukagjinit, Peja dhe Bashkimi, do t’i dalin përballë njëra tjetrës në ndeshjen e parë të serisë gjysmëfinale të Play Offit.

Peja është favorite absolute jo vetëm në këtë ndeshje, por e gjithë serisë.

Verdhezinjtë gjatë pjesës së rregullt të kampionatit e kanë mposhtur katër herë ekipin prizrenas, dy herë në Pejë dhe dy herë në Prizren, dhe kjo është njëra prej arsyeve të favorizimit të tyre.

Ekipi pejan është e motivuar tejmase pas fitores së fundit ndaj Sigal Prishtinës, të cilën e mposhti me rezultat 80-66 po në palestrën ku do të zhvillohet ndeshja e sontme.

Megjithatë trajneri Bujar Loci duhet t’i tregojë basketbollistëve të tij që të kenë kujdes të shtuar dhe ta mos nënçmojnë kundërshtarin e sontëm, pasi që Bashkimi ka një skuadër të pa përshtatshme dhe jo rrallë herë ka ditur ta befasojë Pejën.

Ndeshja Peja - Bashkimi do të fillojë nga ora 20:00, ndërsa gjyqtarët e ndeshjes do të jenë Faton Kurshumlija, Xhavit Beqiri dhe Artan Gashi.