Prishtina nuk lejon përmbysje, arrin finalen!

Pas Pejës, finalistja e dytë e Kupës së Kosovës është Prishtina.

Përkundër përkrahjes maksimale dhe atmosferës fantastike të krijuar në palestrën ‘Minatori’, Trepça nuk arriti ta befasojë kampionin në fuqi të Kosovës. Trepça me epërsi e mbylli vetëm çerekun e parë, çerek i cili u mbyll me epërsinë e ‘xehetarëve’ falë një serie 10-0. Më pas, shkëputja e Prishtinës filloi nga çereku i dytë, ku Prishtina pranoi vetëm 6 pikë dhe shënoi plot 15.

Çereku i tretë ishte i barabartë, mirëpo epërsia e krijuar nga Prishtina pas pjesës së parë, i mundësonte kryeqytetasve rehati dhe akcione të gjata dhe pas 30 minutave, epërsia e Prishtinës ishte +8.

Në çerekun e fundit, Trepça e ngushtoi epërsinë deri në 2 pikë dhe ndeshja ishte shumë dramatike në çastet e fundit, mirëpo më të përqëndruar në çastet vendimtare u treguan kryeqytetasit, të cilët nuk lejuan përmbysje dhe shënuan fitore për t’u kualifikuar në finalen e së dielës.

Më të dalluarit te mitrovicasit sonte ishin Jeremy Wise me 18 pikë, 2 kërcime e 1 asistim, Montrael Scott me 11 pikë e 9 kërcime dhe Samir Zekiqi me 10 pikë, 5 kërcime e 2 asistime, kurse te Prishtina u dalluan Jabarie Hinds me 16 pikë e 1 kërcim dhe Drilon Hajrizi me double-double prej 10 pikëve, 11 kërcimeve e 1 asistimi.

Sa i përket ‘Plisave’, tifogrupi kryeqytetas arriti me vonesë në palestër dhe vendin e vet në tribuna e zuri në fundin e çerekut të dytë.

Në finale, Prishtina luan ndaj Pejës ditën e diel.

KB TREPÇA

KB PRISHTINA