PRIZRENI-16 - RAHOVECI
Prizreni e nis me fitore stinorin në Superligë
15 September, 2021 @21:10
Fituesi i Superkupës së Kosovës, Prizreni-16, e nisi me fitore edhe në Superligën e Kosovës.
Djelmoshat e trajnerit Arbnor Rifati, e mposhtën Rahovecin me rezultat 106-96.
Rahoveci pas 2 çerekëve të parë kishte 1 pikë epërsi, por Prizreni u rikthye me mbrojtje të fortë në çerekun e tretë, ku pësoi vetëm 10 pikë dhe arriti të krijojë një epërsi dyshifrore.
Vreshtarët në çerekun e katërt e ngushtuan disavantazhin pak, por Prizreni e kontrolloi ndeshjen dhe e arriti fitoren e parë të stinorit.
Në këtë ndeshje ishte i pakapshëm fundori Ivan Koljevic. Ai ishte shumë afër shifrave magjike triple-double, pasi që luajti me 31 pikë, 12 asistime e 8 kërcime.
Koljevic u ndihmua edhe nga Coutney Fells me 29 pikë e 11 kërcime.
Te Rahoveci u dalluan Eric Davis Jr me 33 pikë e 8 kërcime dhe Nick Banyard me 28 pikë e 11 kërcime.
Prizreni-16 në xhiron e dytë do të takohet me Trepçën, kurse Rahoveci me Dritën.
