Fantasy TopSporti
Të gjitha lajmet
Tabelat dhe Rezultatet

FT: YLLI - RAHOVECI

Rahoveci fiton dramën në Suharekë, merr kreun në tabelë

Rahoveci fiton dramën në Suharekë, merr kreun në tabelë


28 February, 2021 @18:38

Skuadra e Rahovecit i ka dhënë fund serisë së zezë prej pesë humbjeve rresht në Superligë, duke e mposhtur Golden Eagle Yllin me rezultat 67-72 në një dramë të vërtetë që u zhvillua në Suharekë.

Ndeshja ishte shumë afër të shkojë në vazhdime pasi që Ylli kishte aksionin e fundit kur rezultati ishte 67-70, por mbrojtja e mirë e vreshtarëve e pamundësoi një tentim për tri pikë të kundërshtarit dhe me kundërsulm më pas nga Isiah Traylor u përcaktua rezultati final.

Në fakt, Rahoveci do të mund të kishte një finish më të lehtë kishte 6 pikë epërsi (61-67), por me pikët e Valon Bunjakut, Demetris Morant dhe Erjon Kastratit, fitorja e Rahovecit erdhi në pikëpyetje për një kohë duke u ngushtuar rezultati në vetëm një pikë 67-68.

Megjithatë, deri në fund të ndeshjes vreshtarët shfrytëzuan mirë avantazhin e krijuar dhe siguruan fitoren shumë të rëndësishme, që i bënë ata liderë të përkohshëm me një ndeshje më shumë.

TABELA AKTUALE

Më i dalluari në fitoren e Rahovecit ishte Isiah Traylor me 16 pikë, derisa edhe Arian Qallaku, Alban Veseli, Marvin Jones dhe Altin Morina e mbyllën takimin me pikë dyshifrore.

Në anën tjetër, dyshja Erjon Kastrati dhe Valon Bunjaku ishin bartësit e lojës te Ylli, duke shënuar 19, përkatësisht 18 pikë. Ndërkaq, pllejmekeri Mitchell Wilbekin nuk u paraqit fare.

Vlen të ceket se kjo ishte fitorja e parë e Rahovecit me trajnerin e ri, Fotis Takianos.


 
Të gjitha lajmet nga FBK Superliga