Shahada Wells - play i ri te Peja

Edhe një lojtar i huaj, edhe një kartë shtesë në dorën e Rami Hadarit. Peja mbrëmë vonë zyrtarizoi amerikanin Shahada Wells si lojtar të ri të ekipit, ndërsa basketbollisti që luan në pozitën e playmakerit do të jetë pjesë e ekipit nga “Karagaçi” përgjatë stinorit 2024/25.

Wells 24 vjeçar është 182 centimetra i gjatë, ndërsa deri tash ka qenë pjesë e ekipeve amerikane nga NCAA. Në stinorin e fundit ka luajtur për McNeese State ku mesatarisht ka dhënë 18.4 pikë për ndeshje, 5 asistime për ndeshje dhe 4.8 kërcime për ndeshje.

Sipas web-faqeve basketbollistike Wells ka luajtur përgjatë kësaj vere edhe në Summer League të NBA-së, për ekipin e Houston Rocketsit, ku mesatarisht ka pasur rreth 5 minuta për lojë.

Wells përndryshe njihet si organizator shumë i mirë, që ndanë topat te bashkëlojtarët, ndërsa ka dorë të butë si për dy ashtu edhe për tre pikë. Me këtë, Peja tashmë në ekipin për stinorin e ri të garave ka çuar numrin e lojtarëve të huaj në tre, pas Adong Makouit dhe Jawaun Danielsit.