Sllovenia fantastike, eliminon favoriten dhe arrin finalen

Edhe pse të gjithë e prisnim një duel më të barabartë mes përfaqësueseve që nuk dijnë për humbje që një kohë të gjatë, ishte Sllovenia ajo që prishi planet e adhuruesve të basketbollit.

Me lojë fantastike, mbrojtje solide e sulm efikas, Sllovenia e mposhti bindshëm përfaqësuesen e Spanjës, kampione në fuqi dhe favorite për ta fituar këtë Kampionat Evropian, për ta arritur kështu kualifikimin në finale.

Diferenca në rezultat u bë në çerekun e tretë, aty ku Sllovenia shënoi 12 pikë më tepër se kundërshtari, ndërsa Spanja më pas ishte e pafuqishme për ta realizuar ndonjë rikthim senzacional dhe takimi u mbyll me fitoren e Sllovenisë me rezultat 72-92.

SKEMA DREJT FINALES - EUROBASKET 2017

Më të dalluarit te Sllovenia sonte ishin Dragic dhe Randolph me nga 15 pikë, mirëpo për t’u përmendur padyshim që është paraqitja fenomenale e 18-vjeçarit Luka Doncic, i cili sonte arriti double-double me 11 pikë e 12 kërcime. Te Spanja u dallua Pau Gasol me 16 pikë, i cili këtë evropian e mbyll me sukses personal pas rekordit të thyer në pikë të shënuara, mirëpo Spanja e tij nuk e arriti mbrojtjen e shumëdëshiruar të trofeut.

Duhet përmendur që kjo është hera e parë që Sllovenia arrin në një finale të një kampionati evropian të basketbollit dhe këtë gjë kjo përfaqësuese e arriti pa asnjë humbje, si në fazën kualifikuese, ku ishte në grup me Kosovën, ashtu edhe gjatë gjithë këtij kampionati. Në finale Sllovenia e pret fituesin e duelit mes Rusisë e Serbisë, duel i cili zhvillohet nesër mbrëma.