Trajneri i Cibonës, afër Pejës!

Kampionja e Kosovës në basketboll, Peja, e cila është në kërkim të trajnerit të ri për stinorin 2013/14 është shumë afër marrëveshjes me trajnerin që e bëri Cibonën kroate kampion sivjet. 

Daniel Lutz, ka qenë ndihmës trajner në tre vitet e kaluara, 2010, 2011 dhe 2012, te Cibona ku ka punuar me Velimir Perasovicin (bashkëlojtar i Drazen Petrovic), Jasmin Repesa dhe Veljko Mrsic. Ndërsa stinorin e fundit si kryetrajner ka udhëhequr ekipin më të famshëm kroat drejt titullit kampion. 

Peja brenda javës së ardhshme pritet të vendos për trajnerin e ri, ndërsa gjithashtu pret edhe një përgjigje nga Rudolf Jugo, që i udhëhoqi drejt titullit në 2012/13. 

Lutz, është zgjedhur trajneri më i mirë i vitit 2013 në Kroaci, duke e mposhtur Ante Nazonën e Zarës me vota në finale 77-13.

Cibona ka emëruar si trajner për stinorin e ardhshëm trajnerin me emër Neven Spahija dhe ardhja e Lutzit në Pejë, është shumë e mundshme, nëse arrihet akordi mes palëve gjatë këtyre ditëve, ka thënë një burim pejan i afërt me klubin për Borozani.com. Sa i përket Agon Fehmiut për të cilin u përfol ditë më parë, ai mund të merr post drejtues, por për shkak se ka biznes dhe familjen në Prishtinë është vështirë që të bëhet trajner në Pejë. Gjithçka pritet të sqarohet brenda këtyre ditëve, ka njoftuar burimi pejan.