Trepça, po frymon si ekip

Spanjolli Israel Martin është ambientuar në qytetin verior të Kosovës, Mitrovicë. Po kalon ditë të mira aty, derisa Trepçën po mundohet ta bëj ekip sa më kompakt që është e mundur. 

Ish kampionja e Kosovës ka nevojë edhe për disa përforcime, por Martin me kryesinë nuk nguten në përzgjedhje të të huajve. Ata duan të marrin basketbollistë që me të vërtetë i duhen. 

-Si po shkon puna në Trepçë, gati dy muaj pasi që arritët në Mitrovicë?! 

Israel Martin: Te Trepça gjithçka është duke shkuar si duhet. Jemi duke u stërvitur sa më profesionalisht që është e mundur. Basketbollistët po punojnë mirë. Çdonjëri po mundohet të jep 100%-shin dhe po ndjehem mirë me ekipin që kam për momentin. Do të doja që kjo atmosferë të mbretërojë deri në fund të stinorit. Të mendohet më shumë si ekip sesa në statistika individuale. Në opinionin tim, nëse çdo lojtar mendon se si mund të bëj më shumë për ekip, do të fitojë më shumë ndeshje, sesa një lojtar që mendon për statistika individuale. Së bashku jemi më të fortë. Unë besoj në këtë. 

-Si po i shihni kushtet e punës dhe çka pritni nga ekipi juaj? 

Israel Martin: Çdokush e din se këtë stinor ne jemi në hendikep të madh duke mos pasur palestrën Minatori të gatshme për stërvitje të rregullta. Mirëpo, si trajner, unë nuk i dua arsyetimet dhe preferoj që të punohet dhe të transmetohen gjërat pozitive në ekip që është shumë më e frytshme sesa çdo ditë të bisedohet për mungesë të palestrës dhe gjëra të tilla. Natyrisht që kur të jetë gati Minatori, do të jetë lajm shumë i mirë si për Trepçën ashtu edhe për qytetin e Mitrovicës. 

-Ekipi si po ju duket, keni nevojë për përforcime shtesë? 

Israel Martin: Për momentin ekipi nuk është i kompletuar. Ne jemi duke punuar shumë që të gjejmë një ose dy lojtarë, mirëpo nuk duam të bëjmë gabim dhe preferojmë që të presim momentin e duhur për t’i marrë. Duam që të jemi të sigurtë se lojtari që vjen do t’i plotësojë mungesat që kemi. Pas kësaj, ne duhet të vazhdojmë që të punojmë me lojtarët në dispozicion, sepse ekipi është ky. Kemi atmosferë të jashtëzakonshme në ekip dhe dua të bëj punë shumë të mirë me Trepçën. 

Israel Martin është trajneri i parë spanjoll që ka zbarkuar në Kosovë. Ai ka udhëhequr disa ekipe në Spanjë, derisa ka qenë ndihmës trajner i trajnerëve me emër. Martin ka përvojë 13 vjeçare si trajner basketbolli, ndërsa dallohet me aftësinë e tij të ngritjes së ekipeve me buxhet të vogël në nivele më të larta. 

Trepça, do t’ia nis Superligës së Kosovës në basketboll në ndeshjen e parë si mysafire ndaj Kastriotit në Ferizaj, në palestrën Bill Clinton.