Treshet e fundit s’funksionuan, Prishtina e Re ia merr nga dora fitoren AS-it

Një derbi lokal, që ka shkuar në betejë për secilin top në momentet e fundit të ndeshjes ka përfunduar me fitoren e Prishtiëns së re, ku ekipi i drejtuar nga Albert Sylejmani ka mposhtur atë të Valentin Spaqit.

Dueli përfundoi me fitoren e Prishtinës së re 75-76 që luajti në cilësinë e mysafirit, derisa vendasit ishin afër të përmbysnin gjithçka të arritur një çerek më parë nga ekipi i Sylejmanit [18-19, 19-13, 13-27 dhe 25-17].

Një minutë e dhjetë sekonda para fundit të ndeshjes epërsia ishte 75-74 në të mirë të AS Prishtinës. Don Shehu nuk arriti të shënojë treshen 32-sekonda para fundit. Topin e kapur, 26-sekonda para fundit Dion Haxhosaj, më i dalluari në ndeshje, nuk arriti ta çojë në kosh.

TABELA AKTUALE

Kërcimi i Adhurim Aliajt doli të jetë vendimtar. Ai kapi topin, u nis për kundërsulm dhe u faulua. I shënoi pikët nga gjuajtja e lirë 12-sekonda para fundit të ndeshjes dhe ekipi i tij mori epërsinë 75-76.

Pas time-outit të fundit, AS-i provoi edhe dy herë për të shënuar me treshe, por as tentimi i Ensar Berishës, e as ai i Rron Kurtit nuk qëlluan koshin, për të shkuar fitorja dhe gëzimi te Prishtina e re e Albert Sylejmanit, që kështu në një ndeshje dramatike hapi stinorin me fitore në Ligë të Parë.

Reprezentuesi Haxhosaj ka qenë më i dalluari i ndeshjes me 32 pikë të shënuara e 27 kërcime të regjistruara. Por këto statistika në fund, i shkuan kot pasi ekipi humbi.

Në anën tjetër, treshja Arbër Sinani (26 pikë, 9 kërcime, 5 asistime), Adhurim Alijaj (23 pikë, 8 kërcime, 5 asistime) dhe Arti Islamaj (21 pikë, 5 kërcime) u treguan jetik për skuadrën që arriti fitoren.