Ylli dominon, siguron gjysmëfinalen ndaj Prishtinës

Ylli nuk ka lejuar befasi në përballjen çerekfinale të Kupës së Kosovës ndaj Prizrenit, ndërsa ekipi i Adis Beciragicit ka mposhtur Ponte Prizrenin e Edin Kërveshit për të siguruar gjysmëfinalen e garës.

Kampionët aktual të Kosovës janë duke kërkuar trofeun e parë të Kupës së Kosovës, ndërsa me lojën e fuqishme të treguar në pjesë të parë të ndeshjes, kanë shkuar lehtë te fitorja në pjesë të dytë, duke mposhtur kundërshtarin nga qyteti i Prizrenit, që nuk po gjen formën e stinorit të kaluar.

Ylli fitoi ndeshjen ndaj Prizrenit 93-78, ndërsa siç u cek edhe më lartë, dallimi kryesor u bë në pjesë të parë, kur suharekasit fituan çerekun e parë 28-18 dhe të dytin 23-18 për të kontrolluar gjithçka në vazhdim, ashtu që të sigurojnë Final Fourin e garës.

SKEMA e KUPËS

Rashun Davis ka shkëlqyer te Ylli sonte, duke shënuar 25 pikë, duke shutuar saktë për tri pikë me 5 sosh nga 8 tentime. Shtatëmbëdhjetë pikë dha Chris Harris, i cili kreu lojën me double-double duke regjistruar edhe 14 kërcime. Wes Washpun, transferi i fundit i skuadrës së Yllit luajti me 15 pikë e 9 asistime në këtë fitore.

Te ekipi i Kërveshit, dyshja Wayne Arnold dhe Adam Grant kanë qenë koshashënuesit më të mirë, që shënuan mbi gjysmëën e pikëve të skuadrës, ku i pari kreu lojën me 16 ndërsa i dyti me 23 pikë. Por, nuk mjaftuan për të bërë ndonjë rikthim potencial në pjesë të dytë.

Fitorja, bën që Ylli të ndeshet me Prishtinën në gjysmëfinale të Kupës (e premte, 20:00), ndërsa Ponte Prizreni eliminohet nga gara.