SIGAL PRISHTINA
Zbulohet përforcimi amerikan i Prishtinës
3 August, 2015 @20:46
Zyrtarizimi i Yll Kaçanikut në konferencën e sotme për shtyp, nuk e ka ndalur skuadrën e Sigal Prishtinës e cila edhe më tej mendon për përforcime.
Faqja e njohur e basketbollit, Sportando, ka zbuluar se basketbollisti amerikan, LaceDarius Dunn, është basketbollisti i ri i Sigal Prishtinës, megjithëse një gjë të tillë ende nuk është njoftuar nga klubi bardhekaltër.
Kush është LaceDarius Dunn?
Amerikani 28 vjeçar është 193 centimetra i gjatë dhe luan në pozitën 2, pozitë kjo që në stinorin e fundit luante Dardan Berisha.
Dunn njihet me aftësitë e tij ofansive dhe defansive, ndërsa në stinorin e fundit ka luajtur për skuadrën Sakarya Isik Koleji në ligën e dytë të Turqisë, duke regjistruar mesatare prej 20.9 pikësh, 5.2 kërcimesh dhe 1.9 asistimesh për ndeshje. Ai gjithashtu ishte zgjedhur njëri prej basketbollistëve më të mirë në mbrojtje sipas faqes eurobasket.com në ligën e dytë të Turqisë.
Në stinorin 2013-14 ka luajtur për skuadrën nga elita polake AZS Koszalin, ku në 33 ndeshje ka regjistruar 15.7 pikë, 4.6 kërcime dhe 2.7 asistime.
Dunn më parë ka luajtur edhe për skuadrën Bnei Herzliya nga Izraeli dhe S.L. Benfica nga Portugalia.
Video
