6/6, Prishtina fiton edhe në Prizren

Në ndeshjen hapëse dhe kryendeshjen e xhiros së VIII në Superligën e Kosovës në basketboll, skuadra e Prishtinës e ka mposhtur në Prizren skuadrën e Bashkimit me 10 pikë diferencë në rezultat. Përveç skuadrave, që janë rivale të vjetra në basketbollin kosovar, për t’u përmendur nga ky ballafaqim është fakti që për herë të parë në një ndeshje të Superligës së Kosovës u përballën një trajner grek, Takianos i Bashkimit, dhe një turk, Kandemir i Prishtinës.

Prizrenasit ishin më të mirë vetëm në çerekun e parë, ndërsa më pas ishin mysafirët ata të cilët krijuan epërsi, të cilën e ruajtën deri në fund dhe ndeshja u mbyll me rezultatin përfundimtar 61-71.

TABELA AKTUALE SUPERLIGA

Më të dalluarit te Bashkimi sonte ishin Adrian Motley me 27 pikë, 5 kërcime e 2 asistime dhe Samir Zekiqi me 16 pikë, 6 kërcime e 1 asistim, derisa te Prishtina më i miri sonte ishte Dardan Berisha me 26 pikë, 6 kërcime e 2 asistime

Kjo fitore e vazhdon rekordin perfekt të Prishtinës me 6 fitore në po aq ndeshje, pasi që siç dihet Prishtina ka 2 ndeshje më pak të zhvilluara për shkak të angazhimeve në FIBA Europe Cup, ndërsa Bashkimi në anën tjetër pas 8 xhirove tashmë ka 5 fitore e 3 humbje dhe përkundër humbjes së sontme vazhdon të mbetet në krye momentalisht.