Altin Morina: Është traditë të fitojmë në Suharekë

Pllejmekeri i Rahovecit, Altin Morina, pas ndeshjes ndaj Golden Eagle Yllit, ku skuadra e tij fitoi me rezultat 67-72, tha se fitore të tilla në Suharekë janë bërë traditë për vreshtarët pasi që po bëhen si shpesh.

RAPORTI I NDESHJES

”Është traditë të fitojmë në Suharekë, pasi po bëhet goxha si shpesh. Së pari dua ta falenderoj trajnerin për punën e madhe që e ka bërë në këto 10 ditë, i cili punuar maksimalisht me ne dhe fatmirësisht sot puna e tij u tregua me fitoren kundër Yllit në Suharekë. Kërkesa kryesore e trajnerit është që mbrojtja të jetë stabile. Kur kemi mbrojtje si kjo, atëherë sulmi zakonisht vjen vetvetiu,” tha basketbollisti prizrenas i cili më parë ka veshur edhe fanellën e Yllit.

Tutje, Morina komentoi edhe për gjendjen e skuadrës së tij në tabelë dhe për ndeshjen e radhës që do të luhet ndaj Vëllaznimit në Gjakovë.

“Sivjet është një kampionat shumë i çuditshëm. Të gjitha skuadrat janë forcuar dhe prej secilës mund të pritet fitore dhe humbje. Ambiciet tona janë që të arrijmë sa më lartë. Do të japim maksimumin edhe në ndeshjen e ardhshme ndaj Vëllaznimit. E rëndësishme është që të japim maksimumin si sot në këtë ndeshje, ndërsa rezultati të mbetet i fundit,” përfundoi ai.