Ameer Jackson - përforcimi i ri te Rahoveci

Skuadra e Rahovecit që ka shënuar fitoren e parë të stinorit ndaj Prishtinës, duke mos llogaritur ato ndaj Dritës në kampionat, ka regjistruar përforcimin e parë pas ardhjes së trajnerit të ri në ekip.

Ai është amerikani Ameer Jackson, ndërsa luan në pozitat 1/2 ka bërë të ditur klubi. Sipas klubit, ai ka përvojë të madhe nga ligat e ndryshme, ku janë përmendur Iraku, Katari, Tunisi dhe Rumania ndër të tjera.

Basketbollisti 27-vjeçar dhe 193-centimetra i gjatë pritet të sjell përvojën e tij te vreshtarët, për t’i përmirësuar rezultatet e klubit.

Ai në 5 ndeshjet e zhvilluara me klubin e tij të fundit në Republikën Dominikane, Soles, ka regjistruar 7 pikë për ndeshje, 2.4 asistime dhe 1.4 kërcime në 16.8 minuta sa kishte mesatarisht në këto ndeshje.