Arben Krasniqi: T’i shfrytëzojmë përparësitë

Përzgjedhësi i përfaqësueses së Kosovës, Arben Krasniqi, para duelit të nesërm ndaj Bullgarisë, ka thënë se ekipi është gati dhe kësaj radhe do të provojë t’ia dalë për të shënuar fitore.

Ai ka cekur gjithashtu se asnjë lojtar nuk është i lënduar dhe pritet një duel i vështirë ndaj një kundërshtari të papërshtatshëm.

“Duhet të mundohemi maksimalisht që të luajmë pa kurrfarë frike dhe pa presion ashtu si në ndeshjen kundër Ukrainës. Ne do të hyjmë në ndeshje për të nxjerr rezultat sa më të mirë. Basketbollistët kanë pushuar të dielën, kemi stërvitur të hënën në Prishtinë, do të stërvitemi të martën në mbrëmje dhe të mërkurën në mëngjes në Sofje. Nuk kemi problem me lëndime, të gjithë lojtarët janë të gatshëm për ndeshje. Ne e kemi analizuar lojën e Bullgarisë, ata janë një ekip që vrapojnë shumë. E kanë një lojtar shumë të mirë që luan së bashku me Justin Doellman-in te Barcelona e ai është Aleksandar Vezenkov. Për dallim nga Ukraina, Bullgaria nuk ka qendra masive dhe ne do të mundohemi ta shfrytëzojmë maksimalisht këtë, por edhe përparësitë e tjera që i kemi. Edhe ne i kemi disa mangësi, por po mundohemi t’i eliminojmë nga ndeshja në ndeshje, ende jemi duke u mësuar, të gjithë po mundohemi të bëjmë më të mirën. Në çdo lojë po hyjmë për fitore, ndaj Ukrainës e treguam një fytyrë krejt tjetër dhe do të bëjmë përpjekje të vazhdojmë të përmirësohemi edhe në takimet tjera që na presin. Po mundohemi me ngrit shpirtin e ekipit dhe kur ta bëjmë këtë 100%, atëherë mundemi të presim rezultate pozitive”.

ORARI DHE TABELA

Bullgaria - Kosova, luhet nesër me fillim prej orës 18 në Sofje.