Artini te Trepça

Peja ka liruar edhe njëherë basketbollistin e saj, Artin Gashi. Pasi që pejanët e transferuan nga Bashkimi një stinor më parë, duke ia lëshuar si huazim të njejtin për një gjysmëstinor, tash ai i është bashkuar radhëve të ish kampiones, Trepça. 

“Dje kemi arritur marrëveshjen dhe për një stinor do t’i mbrojë ngjyrat e Trepçës,” ka thënë aloja 202 centimetra e gjatë ekskluzivisht për Borozani.com 

“Shpresoj që të arrij sukses me Trepçën dhe t’i tejkalojmë sfidat bashkë si ekip,” ka shtuar Gashi ndër të tjera dhe ka bërë të ditur synimet e skuadrës. 

“Së pari kualifikimi për Play-Off, pastaj do të vazhdojmë luftën për më lartë,” ka qenë i qartë basketbollisti që fitoi titullin e kampionit me Pejën në stinorin e kaluar, përkundër se kishte paraqitje shumë të pakta për ekipin nga Karagaçi. 

Gashi ka qenë basketbollist i Bashkimit, prej ku kaloi në Pejë. Gjysmëstinorin vjeshtor 2012/13 e kaloi si huazim në Sigkos Bashkimi, para se t’i bashkangjitet përsëri Pejës. Ai njihet si basketbollist luftarak nën kosh dhe me kërcim të lartë. 

Trepça për stinorin që vjen ende nuk ka angazhuar ndonjë trajner, ndërsa muajin e kaluar ka humbur basketbollistin kryesor të tyre, Drilon Hajrizi, që kaloi në Pejë si dhe lojtarin me potencial të madh, Samir Zekiqin, që kaloi në RTV 21.