Bashkimi në finale

Skuadra e Bashkimit është treguar e pagabueshme edhe në ndeshjen e tretë të serisë gjysmëfinale të Playoffit ndaj Pejës, duke e mposhtur me rezultat 96-117, për të siguruar finalen e parë pas tetë viteve.

Sinjalet për fitoren e Bashkimit u panë qysh në çerekun e parë, ku portokallezinjtë shënuan plotë 41 pikë dhe krijuan epërsi prej 21 pikëve.

Ndërsa në vijim, lojtarët e Bashkimit u përkujdesën për ta ruajtur epërsinë, duke mos lënë Pejën në asnjë çast që ta rrezikojë këtë fitore.

Peja edhe në këtë ndeshje u paraqit me vetëm 7 lojtarë, për shkak të largimit nga skuadra të yjeve kryesorë, ndërsa tre nga lojtarët e paraqitur sot (Mekaj, Qallaku, Abramovic), nuk pushuan për asnjë sekondë dhe luajtën tërë ndeshjen.

Qallaku ishte koshashënuesi më i mirë te Peja me 31 pikë të shënuara, kurse te Bashkimi amerikani Kayel Locke që luajti me double-double prej 33 pikëve dhe 13 kërcimeve dhe Justin Black që luajti me shifrat magjike triple-double prej 20 pikëve, 11 kërcimeve dhe 14 asistimeve, ishin ndër më meritorët për fitoren e sotme të Bashkimit në Karagaç.

Skema e Playoffit

Bashkimi në finale do ta pret fituesin e serisë së tjetër gjysmëfinale ndërmjet Trepçës dhe Sigal Prishtinës, ndërsa kjo e fundit është shumë afër të bëhet kundërshtare e Bashkimit, pasi që avanson me 2-0 në seri dhe i nevojitet vetëm edhe një fitore për ta shënuar emrin e saj në finale.

Peja

Bashkimi