Feronikeli’74 vendos t’i vazhdojë garat!

Skuadra e Feronikelit’74 ka vendosur t’i vazhdojë garat në Superligë të Kosovës, pas një vendimi të marrë dje për tërheqje nga garat. Klubi nga Drenasi që u themelua dy vite më parë në saje të fuzionimit me një skuadër nga Liga e Tretë e Kosovës pas shuarjes së Feronikelit, u ankua në referim të ndeshjeve dhe për këtë kishte thënë “Mjaft është mjaft!”

Feronikeli’74 në stinorin e kaluar u ngrit për herë të parë në histori të saj në Superligë, ndërsa mbijetoi aty falë ndeshjes së barazhit ku mposhti Prishtinën e Re! Këtë stinor, ekipit nuk po i shkon mirë me rezultate, ndërsa pas ndeshjes ndaj Llapit 2-2, ku kishin epërsinë 0-2 dhe e shkrinë në fund, dolën me komunikatë për largim nga garat, ku si fajtor panë referimin.

Dje, koha.net raportoi se FFK nuk ka marrë asnjë letër zyrtare nga Feronikeli’74 për këtë vendim të tyre për largim nga garat. Ndërsa klubi i Feronikelit’74 mbrëmë bëri të ditur se do të mbajë konferencë për shtyp, ku ftoi mediat që të jenë të pranishme.

Sot, në një konferencë për media kreu i klubit Endrit Krasniqi bëri të ditur se Feronikeli’74 do të vazhdojë garat, ndërsa kapiteni i ekipit Lapidar Lladrovci ka thënë ndër të tjera se “për hir të futbollit dhe tifozëve, kemi vendosur të mbesim në ligë.”