FIBA: Ndihmësi i NBA, gati për fitore me Kosovën

Në një artikull të botuar sot nga faqja zyrtare e shtëpisë botërore të basketbollit, FIBA, është folur për përzgjedhësin e ri të përfaqësueses së Kosovës, Brad Greenberg.

“Ish ndihmësi i NBA-së Greenberg, i gatshëm që të fitojë ndeshje si shef i ri i Kosovës,” ka qenë titulli i FIBAs për përzgjedhësin e prezentuar në muajin që shkoi nga FBK-ja.

Greenberg 63 vjeç ka nënshkruar kontratë një vjeçare me mundësi vazhdimi me FBK-në, me qëllim që të kualifikojë reprezentacionin në kualifikime për Botërorin 2019.

“Qëllimi është që të fitojmë ndeshje. Nuk mund të them sa do t’i fitojmë, por lirisht mund të them se kërkojmë fitore dhe të shkojmë tutje nga parakualifikimet,” ka thënë Greenberg, që ka punuar si ndihmës i Los Angeles Clippers dhe New York Knicks në vitet e 80-ta të shekullit të kaluar.

Kosova është në Grupin C të parakualifikimeve për Botëror me kundërshtarë: IRJ Maqedonia dhe Estonia. Ndeshjet do të zhvillohen në sistemin brenda-jashtë të mërkureve dhe të shtuneve në periudhën 2-19 gusht 2017.

Dy ekipet e para shkojnë nga parakualifikimet, në kualifikime të zonës europiane për Botëror.