BIBL nis në Prizren

Me fillim në ora 19:00 nesër mbrëma në Prizren, në palestrën Sezai Surroi, nis stinori i ri i Balkan League, që këtë stinor ka për sponzor të ligës kompaninë shqiptare, Sigal. 

Bashkimi do të debutojë në BIBL nesër si ekip i ri i pranuar për këtë garë, derisa Peja tashmë ka përvojë dy vjeçare në këtë garë dhe ka arritur gjysmëfinalen stinorin e kaluar, duke u radhitur në katër skuadrat më të rëndësishme të kësaj gare në 2014/15. 

Ekipi prizrenas ka zhvilluar duelin me Pejën edhe në Superligë, saktësisht në xhiron e dytë të saj dhe u mposht nga verdhezinjtë në Sezai Surroi me 7 pikë dallim, 72-79. 

Bashkimi do të tentojë të nis me fitore stinorin debutues në BIBL, por Peja është treguar e pamposhtshme këtë stinor duke fituar të gjitha ndeshjet e zhvilluara, si në Superkupë ndaj Sigal Prishtinës, ashtu edhe në kampionatin vendor. 

Bashkimi dhe Peja bëjnë pjesë në Grupin B të BIBL, ndërsa si rivalë tjerë të grupit kanë edhe ekipet malaziase, Teodo dhe Lovçen si dhe Levski 2014 nga Bullgaria.