LIGA UNIKE
Çiftet gjysmëfinaliste dhe orari i ndeshjeve në Ligën Unike
7 April, 2021 @21:48
Me dy ndeshjet e sotme çerekfinale Goga Basket - Tirana dhe Sigal Prishtina - Golden Eagle Ylli, është kompletuar numri i skuadrave të kualifikuar në gjysmëfinalet e edicionit të parë historik të Ligës Unike.
Dje në gjysmëfinale ishte kualifikuar Peja, e cila e mposhti Vllazninë e Shkodrës, ndërsa para saj kualifikimin e kishte siguruar Rahoveci pa zhvilluar ndeshje, për shkak të vendimit të Teutës së Durrësit për t’u tërhequr nga gara.
Ndërsa sot në gjysmëfinale u kualifikuan edhe Goga Basket dhe Golden Eagle Ylli. E para e mposhti Tiranën në ëerekfinale, ndërsa i dyti e mposhti Sigal Prishtinën.
Çiftet gjysmëfinaliste Peja - Rahoveci dhe Goga Basket - Golden Eagle Ylli do të takohen më 13 prill në Durrës, ndërsa fituesit e këtyre çifteve një ditë më pas (14 prill) do të luajnë për titullin e parë kampion të kësaj lige.
ORARI:
13 Prill
16:00 Gjysmëfinalja e parë: Rahoveci-Peja
19:00 Gjysmëfinalja e dytë: Goga Basket-Golden Eagle Ylli
14 Prill
16:00 Ndeshja për vendin e tretë
19:00 Finalja e madhe.
