Çka tha Beciragic për Dardan Berishën pas titullit kampion të Yllit?

Skuadra e Golden Eagle Yllit e festoi titullin kampion të Kosovës pas fitores me rezultat 3-0 në serinë finale përballë Pejës.

Trajneri i Yllit, Adis Beciragic, në intervistën e tij pas titullit kampion ndër tjerash përmendi edhe dy basketbollistët e Pejës, Dardan Berishën dhe Lis Shoshin, derisa për Dardanin pati fjalë më shumë.

Ai tha se janë munduar ta ndalojnë këtë dyshe sidomos në momentet kur loja e Yllit ishte më e dobët në sulm. Për Dardanin, Beciragic dha komplimente duke thënë se ka kapacitet që të mposhtë i vetëm skuadrat kundërshtare dhe se është lojtar i nivelit më të lartë se ai i ligës së Kosovës.

“Në disa raste lojtarët ishin të lodhur dhe kemi luajtur dobët në sulm. Në ato raste jemi munduar të jemi të mirë së paku në mbrojtje dhe të bëjmë ç‘mos për ta ndalur Dardanin dhe Lisin. Këta dy mendoj se janë më të mirë se shumë lojtarë të tjerë të huaj. Dardani ka kapacitet të na mposhtë vetëm. Ai është i nivelit më të lartë se sa i Kosovës dhe e di mirë se si të luajë në finale”, tha Beciragic.