OLIPIADA DIMËRORE: PYEONGCHANG 2018
Ditari Olimpik Nr. 2
Shkruan: LUAN MORINA
10 February, 2018 @10:23
I 76ti, prej 82 vetave që kanë përfunduar garën në stërvitjen e dytë, ishte rezultati i Albin Tahirit. Kosovari ka stërvitjen e fundit të shtunën në ora 3 në mëngjes, derisa çdo përfundim i garës do të ishte sukses për Kosovën në Olimpiadën e parë.
Ngjarja kryesore e të shtunës, e cila sjell pesë finalet e para, zhvillohet pasdite në ora 13:35. Është gara e kërcimeve me ski në kërcimoren normale, që do të sjell kërcime rreth 95 metrave. Nuk është gara më atraktive e kërcimeve me ski, por ajo çfarë do ta bëjë këtë garë speciale është pjesëmarrja e legjendës japoneze të kërcimeve me ski, Noriaki Kasai.
Kasai, 45 vjeçar, do të marr pjesë në Olimpiadën e tetë të tij, një rekord tjetër, derisa në Sochi kishte fituar të argjendtën (në kërcimoren e madhe) pas polakut Kamil Stoch. Stoch mbetet favoriti kryesor për të artën sot, para gjermanit Freitag dhe tërë skuadrës norvegjeze. Wellinger ka qenë më i miri në kualifikime, ku Kubacki e Kraft kanë pasur kërcime të mira.
Finalja më e parë e ditës zhvillohet në ora 8 në mëngjes, ku skitaret nordike garojnë në skiathlon që përfshinë 7.5km stil klasik dhe pastaj stil të lirë. Charlotte Kalla, Heidi Weng, Stinna Nilsson, e Marit Bjoergen janë në mesin e favoriteve.
Femrat do të stolisen me medalje edhe në disiplinën e sprintit në 7.5km, garë e cila nis në ora 12:15.
Pesëmbëdhjetë minuta më herët nisin garat në 3000m për femrat në patinazh të shpejtë. Është vetëm një rundë, finale, që përfshinë dymbëdhjetë duele të cilat do të përcaktojnë më të shpejtën. Garat zakonisht zgjasin nga 4 minuta në maksimum, kështu që në ora 13 do të duhej të mësojmë kampionen olimpike.
Finalja e pestë është ajo në patinazh në shtigje të shkurtra. Për dallim prej patinazhit të shpejtë, këtu ka kualifikime, gjysmëfinale, e finale. Sot është finalja në 1500m për meshkuj, e cila nis në ora 13:25.
