E dyta me radhë për Dritën, hap prapa për Prishtinën

Pas fitores ndaj Drenicës xhiron e kaluar, Drita e Ismet Munishit e ka shënuar edhe një tjetër fitore të rëndësishme në luftën për mbijetesë.

Gjilanasit sot e fituan takimin e luajtur ndaj Prishtinës në “Zahir Pajaziti” të Podujevës, në një takim që ishte ‘përsëritje’ e finales së Kupës së vitit të kaluar.

Mund të thuhet që fitorja e Dritës sot ishte plotësisht e merituar, marrë parasysh faktin që ishte Drita ajo që krijoi më shumë raste për shënim, e goditi shtyllën dhe e rrezikoi disa herë portën e kryeqytetasve.

Goli i fitores u shënua në minutën e 78’, moment në të cilin Leotrim Kryeziu i dha epërsinë skuadrës së tij pas një aksioni që zgjati shumë, me Dritën që e goditi dy herë rresht shtyllën horizontale para se topi të përfundonte në rrjetë.

Kjo fitore, e dyta me radhë për Dritën në pranverë, i jep shpresë reale për mbijetesë gjilanasve, kurse Prishtinës ia vështirëson shumë punët në luftën për titull.

TABELA AKTUALE SUPERLIGA

Duhet përmendur që edhe pse ndeshja u luajt në Podujevë, të pranishëm në këtë takim ishin edhe ‘Intelektualët’, edhe ‘Plisat’.