Historike, Prishtina siguron kualifikimin

Me trajnerin Damir Mulaomerovic, Prishtina, është këndellur në garat evropiane dhe pas eliminimit nga Liga e Kampionëve në basketboll, bardhekaltërit kanë arritur suksesin historik për një ekip kosovar.

Prishtina duke e mposhtur edhe në ndeshje të dytë ekipin ukrainas Cherkaski Mavpy, tash me bilanc 3-1 ka siguruar kualifikimin për në fazën tjetër të garave të FIBA Europe Cup, gjë të cilën nuk e ka arritur në dy tentimet e para të saja.

E treta, e vërteta - kësaj radhe doli të jetë për Prishtinën, ndërsa fitorja e sotme u vulos në çerekun e tretë, kur prishtinasit kanë bërë dallim të madh (16-31, çereku III), ndërsa përfundimtarja me 73-92 në të mirë të bardhekaltërve ka qenë rezultati final i ndeshjes.

Ndeshja e sontme u luajt në Vilnius të Lituanisë, për shkak të telasheve politike mes Ukrainës e Kosovës.

AJ Davis ka qenë më i miri te Prishtina me 26 pikë të shënuara ndërsa Demario Mayfield ka shtuar 10 pikë të tjera, duke shtuar edhe 7 kërcime e 6 asistime në llogari të tij.

Amerikani Brandon Young me 17 pikë ka qenë më efikasi te ekipi ukrainas, që pas kësaj humbjeje nuk ka gjasa të arrijë kualifikimin, pasi që ka humbur në të dyja përballjet prej Prishtinës.