Istogu për herë të parë merr një amerikan

KB Istogu që po përgatitet vrullshëm për pjesën pranverore të stinorit në Ligë të Parë të basketbollit, para pak çastesh zyrtarizoi basketbollistin amerikan Terrick Phillips.

Kjo është hera e parë që në Istog zbarkon një amerikan dhe është përforcimi i parë i huaj në histori të këtij klubi.

Por, Phillips nuk është për herë të parë në Kosovë. Ai ka qenë gjatë stinorit të kaluar te Vëllaznimi i Gjakovës, por që për shkak të pandemisë u detyrua të largohet pasi që kampionati u ndërpre.

Terrick luan në pozitat 2 dhe 3 dhe pritet të jetë ndihmesë e madhe për klubin e Istogut, që tashmë duket qartë se ka synim rangun më të lartë të garave të Kosovës në basketboll.

“Klubi ynë zyrtarizon edhe transferimin e tretë këtë afat kalimtar. Duke i parë synimet tona të qarta, jemi duke u angazhuar për mobilizim më të madh të ekipit. Terrick Phillips vjen nga Amerika dhe kjo është hera e parë që në klubin tonë vjen një amerikan për të luajtur,” ka shkruar njoftimi i klubit duke zyrtarizuar lojtarin në fjalë.

Terrick Phillips do të arrijë në Istog të hënën e ardhshme, kur edhe pritet të njoftohet me ambientet e klubit dhe ekipin e tij të ri, për të cilët do të paraqitet në pjesën pranverore të stinorit.