KB Peja me paralajmërim premtues

Nënkampionja e Kosovës në basketboll, KB Peja, përmes një njoftimi të shkurtër në llogarinë e skuadërs në Facebook ka paralajmëruar “Shqiponjat” për sfidat e reja të skuadrës, por me ambicie të njëjta.

“Sezoni tjetër, sfida të reja, por ambicie të njëjta,” ka shkruar shkurt KB Peja, ndërsa ka pyetur tifozërinë nëse janë gati për edicionin 2021/22.

Verdhezinjtë nga Bjeshkët e Rugovës në stinorin e kaluar janë mposhtur në dy finale, atë të Ligës Unike dhe të Superligës, ndërsa ambiciet e klubit mbeten të njëjta edhe këtë stinor - stolisja me njërin nga trofetë e mundshme.

Kujtojmë, ditë më parë trajneri turk Semsettin Bas ka publikuar në llogarinë e tij se ka arritur marrëveshje për të qenë përsëri trajner i Pejës, ndërsa klubi ende nuk ka zyrtarizuar atë.