LeBroni vazhdon, ngjitet mbi Jordanin e Magicun

Fitorja e shënuar nga Cavaliers në ndeshjen e katërt të serisë ndaj Warriors solli disa ngjitje në ranglistat e historisë së basketbollit edhe për LeBron Jamesin, i cili takimin e mbrëmshëm e mbylli me triple-double prej 31 pikëve, 10 kërcimeve e 11 asistimeve.

LeBron James pas ndeshjes së mbrëmshme e ka kaluar Michael Jordanin në 2 kategori: gjuajtje të lira dhe pikë të shënuara në finale të NBA-së. ‘Mbreti James’ tashmë është lojtari me më së shumti gjuajtje të lira të shënuara në histori të finaleve të NBA-së, duke e lënë kështu Jordanin në vendin e dytë, ndërsa sa i përket numrit të pikëve të shënuara në finale, James tashmë është i treti në histori, derisa Jordani ka zbritur në vendin e katërt pas Jamesit.

Përveç pikëve e gjuajtjeve të lira, James mbrëmë është bërë edhe lojtari me më shumti triple-double në histori të finaleve, duke e zbritur në vendin e dytë legjendën e Lakersave, Magic Johnson.