CAVS - WARRIORS @ GAME 4
Fitore e Cavaliers, seria vazhdon
10 June, 2017 @14:05
Vjen humbja e parë për Golden Staten në play off-in e sivjetëm. Kampioni në fuqi, Cleveland Cavaliers, nuk ka lejuar që të deklasohet 4-0 pas 4 ndeshjeve dhe e ka fituar ndeshjen e katërt të serisë, për ta ngushtuar kështu serinë në 3-1 dhe për të krijuar një shpresë tejet të vogël për një rikthim senzacional, rikthim i cili realisht është shumë vështirë që të ndodhë.
Cavaliers e filluan furishëm takimin, duke qenë shumë të saktë nga loja, e në anën tjetër lojtarët e Warriors u ngarkuan me shumë gabime personale, gjë që ndikoi edhe në reduktimin e minutazhit në pjesën e mbetur të lojës, kur dihej rreziku për t’u larguar nga loja me 6 personale të shkaktuara.
Hovin drejt fitores Cavaliers e morën në çerekun e parë, çerek i cili prodhoi një numër tejet të madh të pikëve, duke u mbyllur me rezultat 49-33, derisa çerekët tjerë të ndeshjes ishin më të barabartë dhe Warriors nuk e arritën përmbysjen në asnjë moment, duke bërë kështu që të ketë edhe ndeshje të pestë të serisë.
Më i dalluari te Cavaliers ishte Kyrie Irving me 40 pikë, 7 kërcime e 4 asistime, ndërsa u ndihmua edhe nga i zakonshmi LeBron James, i cili vazhdoi formën e rregullt me triple-double prej 31 pikëve, 10 kërcimeve e 11 asistimeve. Statistikat e arritura mbrëmë nga LeBron James bënë që ai të vazhdojë ngjitjen në ranglistat e ndryshme të historisë së basketbollit. Këtë herë James u ngjit mbi Jordanin në 2 kategori, gjuajtje të lira dhe pikë të shënuara, si dhe e kaloi Magic Johnsonin sa i përket numrit të treshifrorëve të trefishtë (triple-double) në histori të finaleve të NBA-së. Në anën tjetër u veçua Kevin Durant me 35 pikë, lojtar i cili me shumë gjasë do të jetë MVP i finaleve nëse Golden State e mbyll me titull sezonin.
Ndeshja e ardhshme e serisë zhvillohet në shtëpinë e Warriors në mëngjesin e ditës së martë, ndërsa nëse Warriors shënojnë fitore, shpallen kampionë të sezonit 2016/2017. Nëse Cavs triumfojnë, seria ngushtohet edhe më tepër dhe spektakli basketbollistik vazhdon të paktën edhe për një ndeshje.