WARRIORS vs CAVS @ GAME 3
Warriors pranë titullit, Durant vendimtar
8 June, 2017 @8:30
I ardhur nga Oklahoma City Thunder te ekipi nënkampion Golden State Warriors, Kevin Durant, me shutin e tij 45.3 sekonda para fundit të ndeshjes shënoi treshen e madhe të ndeshjes, për të kompletuar 31 pikët e tij në ndeshje dhe për t’ia dhënë fitoren skuadrës së tij 118-113 për epërsinë 3-0 në serinë e finales së madhe të NBA-së.
Kjo fitore, jo vetëm që tani lë Golden State Warriorsin një fitore para titullit të dytë në 3 stinorët e fundit, por i la edhe pa shpresë kundërshtarët kampionë, Cleveland Cavaliers.
Në fakt, Cavaliers, ishin 6 pikë në epërsi 3 minuta para fundit të ndeshjes, para se Durant t’i kthejë luftëtarët në lojë duke shënuar 14 pikë në çerekun e fundit.
Gjëja tjetër e rëndësishme është që me një fitore të radhës në ndeshjen e katërt të serisë që zhvillohet të premten mbrëma, Golden State do të mund t’i vrasë ‘demonët’ ndjekës, të cilët nuk i lanë rehat pas dështimit të ruanin epërsinë 3-1 në stinorin e kaluar, pasi që humbën 4-3 në fund.
Deficitin prej 3-0, nuk ka arritur ta rikthejë askush, ndërsa me lojën e shfaqur aktualisht, edhe për kalorësit kjo i bie të jetë punë Sizifi.
“E tëra çka bëja ka qenë të shikoja apo futet topi në rrjetë. Po punoj në këtë drejtim tërë jetën. Ta shohësh të futet ai top, është çliruese. Duhet të fitojmë edhe një herë,” ka thënë Durant pas ndeshjes.
Durant përfundoi ndeshjen me 31 pikë të shënuara, 8 kërcime e 4 asistime në 40 minuta lojë, derisa Steph Curry shënoi 26 pikë e 13 kërcime. Me 30 pikë u dallua edhe Klay Thompson.
Te kampioni, ndihmë nuk kishte për LeBron Jamesin dhe Kyrie Irvingun. James shënoi 39 pikë në 45 minuta lojë, regjistroi edhe 11 kërcime e 9 asistime. Irving dha 38 pikë tjera, por kot. Ekipi është në disavantazhin e pakthyer në histori të NBA-së, 3-0.
info:
LeBron James me pikët e shënuara sot ka kaluar në pozitën e katërt në listën e përgjithshme të koshashënuesve më të mirë të PlayOffit në NBA., duke e lënë pas legjendën Elgin Baylor. | LeBron James me asistimet e shënuara sot, ka kaluar në pozitën e tretë të përgjithshme të asistuesve në Finalet e NBA-së, duke e lënë pas legjendën Bill Russell. |