Leonat Vitija vendos, Prishtina kthehet te fitorja!

Fitore e rëndësishme e Prishtinës e arritur në “18 qershori” të Klinës sot, ndërsa hero u bë qendërmbrojtësi Leonat Vitija që shënoi me kokë në sekondat e fundit të kohës shtesë, duke goditur me kokë topin pas kornerit, për ta tundur portën e Altik Muhaxhirit dhe për t’ia dhënë fitoren bardhekaltërve mysafir, që fituan ndaj Dukagjinit, 0-1 [Leonat Vitija 90’+7].

Fitorja e Prishtinës së drejtuar nga Jean-Michel Cavalli ka ardhur pas dy barazimeve radhazi, ndërsa në 12 minutat e fundit të kohës së rregullt të ndeshjes atyre iu anuluan dy gola, një për ofsajd (Marc Olivier 78’) e një për faul (Sunday Akinbule 85’).

Dukagjini rastet i kishte në pjesë të parë, kur së pari Altin Merlaku (19’) e më pas edhe Dardan Morina (20’) tentuan nga largësia - ndërsa goditjet e tyre shkuan mbi portën e Ardit Nikës. Prishtina u kundërpërgjigj me Leotrim Kryeziun (24’) që goditi fortë, ndërsa mbrojti Muhaxhiri, e më pas Albin Krasniqi ka humbur rastin më të mirë të ndeshjes që s’u realizua gol, kur doli vetë përballë portierit të Dukagjinit dhe ky i fundit e mbrojti shutin e tij nga afërsia (26’).

Prishtina është e katërta pas XV xhirosh me 25 pikë, pas fitores së shtatë të shënuar sot, ndërkaq Dukagjini është në zonë të barazhit, në pozitë të tetë me 17 pikë nga 15 ndeshje. TABELA AKTUALE