Liga Ballkanike del me njoftim pse nuk ka filluar stinori 2024/25

Liga e basketbollit, ajo ballkanike, ku ekipet nga Kosova kanë marrë pjesë rregullisht prej se u pranuan aty, këtë stinor ka kaluar në qetësi dhe nuk ka filluar stinori.

BIBL, siç shkruhet shkurt ajo, në vitet e fundit ka humbur cilësinë që e ka pasur, ndërsa ka pasur stinorë ku mezi mblidheshin ekipet për të organizuar atë.

Sot, ata kanë dalë me një njoftim ku kanë bërë të ditur se stinori 2024/25 në BIBL nuk do të fillojë tani për shkak se nuk po mund të regjistrojnë klube nga Izraeli dhe deri në janar të vitit 2025 nuk ka fluturime të rregullta për atje.

Kjo, pasi që ekipet nga Izraeli prej vitit 2012 kanë qenë pjesë e rregullt e ligës, është thënë ndër të tjera në arsyetimin e BIBL. Për më tepër, arsyetimi për mosfillimin e garave është thënë të jetë mungesa e cilësisë dhe ndeshjeve interesante me mungesën e klubeve izraelite!

“Kemi pasur stinor të mirë 2023/24 me Final Four tepër të mirë, por po na mungon cilësia dhe ndeshjet interesante, si dhe nuk po mund të gjejmë zgjidhje adekuate që mund të kthejë dy ekipe izraelite në ligë,” ka shkruar në njoftim.

Njoftimi i BIBL është i titulluar “vit i rezervuar, për të vazhduar në 2025” ndërsa ka përfunduar “me shpresë që të përfundojë lufta në Izrael ashtu që të vazhdojnë me lajme të mira!”

Përndryshe rekord-fituesja e BIBL është Prishtina me 3 tituj aty, përfshirë edhe atë të stinorit të kaluar, njëjtë sikurse Levski Sofia që i ka tre të tilla. Ekipet tjera nga Kosova që kanë marrë pjesë aty, maksimalisht kanë arritur nga një finale, Bashkimi dhe Peja.