Liverpooli briliant, kualifikohet me fitoren e shtatë radhazi

Edhe pse nuk mund të thuhet që ka qenë performanca më e mirë e treguar, ekipi i Liverpoolit profesionalisht ka siguruar fitoren ndaj Lille-it të pamposhtur në 21 ndeshjet e fundit në të gjitha garat, për të regjistruar fitoren e shtatë radhazi në Ligë të Kampionëve dhe për të siguruar kualifikimin nga TOP-8 direkt në të tetën e finales.

Mohamed Salah (34’) ka vazhduar me formën e jashtëzakonshme këtë stinor, ndërsa ka shënuar edhe golin jubilar të 50-të për Liverpoolin në gara evropiane, në fitoren 2-1 [Salah 34’, Elliot 67’ - David 62’] ndaj Lille-it, që prej minutës së 59-të të ndeshjes luajti me 10 lojtarë në fushë, pasi që mbrojtësi Aissa Mandi mori kartonin e dytë të verdhë.

Shënuesi më i mirë i Lille-it, Jonathan David barazoi (62’) edhe pse kishin mbetur me një lojtar më pak në fushë, por ka qenë zëvendësuesi Harvey Elliot (67’) që shënoi për fitore. Arne Slot bëhet trajneri i dytë në histori të Ligës së Kampionëve që e nis me këtë ritëm garën, ndërsa i pari me sistemin e ri të garave. Liverpool është ekipi i vetëm perfekt, duke shënuar shtatë fitore në shtatë ndeshje për të arritur te kuota e 21 pikëve makismale! I pari në renditje, natyrisht dhe vetëm dy gola të pranuara deri tash!