Në procedurë disciplinore

Katërdhjetë-e-tetë orë i ka dhënë afat Komesari i Garave të BKT Superligës, Tajar Rifati, Drilon Hajrizit dhe Lenart Vidishiqit për t’u deklaruar me shkrim në lidhje me deklaratat e dhëna në mediume të shkruara dhe televizive, për vërtetësinë, faktimin dhe dëshmitë për pohimet e tyre. 

Inicimi i procedurës disciplinore nga Komisari i Garave ka ardhur pasi që dyshja e lartpërmendur në Televizionin Dukagjini dhe të përditshmen Sport Plus, kanë deklaruar se ndeshjet RTV 21 - Peja dhe RTV 21 - Sigal Prishtina kanë qenë të kurdisura, ashtu që të fitojë RTV 21 dhe të dëmtohet Trepça, duke ua mohuar atyre Play-Offin. 

Trepça, që është kampion aktual, ka vetëm një pikë më shumë se RTV 21 dhe gjendet në pozitën e katërt. Ndërsa RTV 21, debutues në BKT Superligë, është në vendin e pestë dhe ka mposhtur Trepçën dy herë këtë stinor. Deri në fund të stinorit kanë mbetur edhe katër xhiro, ndërsa Trepça do të përballet edhe njëherë me RTV 21-shin. 

Drilon Hajrizi, aktualisht basketbollisti më i mirë i vitit në Kosovë, ka qenë edhe më parë i dënuar duke mos u ftuar në përfaqësuese, për shkak se kishte lëshuar ceremoninë e shpërblimeve të basketbollistit më të mirë të vitit, në shenjë proteste, dy stinorë më parë, kur ky çmim nuk iu dha atij.