RIKUJTIMI PËR FINAL FOUR
Para sezonit të ri, BIBL ri-njofton për Final Fourin në Karagaç
1 June, 2020 @12:29
Në njoftimin e fundit nga liga ballkanike e basketbollit (BIBL), që ekipet e interesuara të bëhen gati për aplikim për stinorin e ri të BIBL, është ri-njoftuar edhe një herë Final Fouri i stinorit 2019/20 në Karagaç të Pejës.
Aty BIBL ka bërë të ditur se duke përcjellë instruksionet e Federatave dhe shteteve përkatëse për pandemi, në shtator 2020 do të mbahet Final Fouri i BIBL që do të luhet në Karagaç me KB Pejën si organizatore.
Katër ekipet pjesëmarrëse në F4 të BIBL janë: Akademik Bultex (BUL), Peja (KOS), Ibar (MNE) dhe Vllaznia (SHQ).
“Në këtë mënyrë ne do të përfundojmë stinorin 2019/20 në mënyrën më të respektueshme, duke i dhënë mundësi të katër skuadrave të garojnë barabartë për titullin e këtij stinori,” është thënë ndër të tjera në njoftimin e BIBL-it.
Deri tash BIBL-in nga skuadrat kosovare e ka fituar Prishtina dy herë, ndërsa Bashkimi një herë është shpallë nënkampion i ligës.